ان استجواب د. سعد الشريع ضد وزيره التربية والتعليم العالي الاستاذة نورية الصبيح المقدم في تاريخ 25 ديسمبر 2007 وتمت جلسه الاستجواب في 8 يناير 2008 وتم توقيع 10 نواب لطلب طرح الثقه للوزيره , والتي تمت جلسه طرح الثقه في تاريخ 22 يناير 2008 وطبعا كما نعلم حصلت الوزيره على ثقة مجلس الامة وتم تجديد الثقة فيها والتى حصدت 27 صوتا ضد طرح الثقة و 19 صوتا مع طرح الثقة وامتناع نائبين .
يبين لنا الاستجواب الكثير من النقاط المهمة والتي يجب ان نستفيد منها :
1. كتلة العمل الوطني : طبعا كتله العمل الوطني هي اول القوى السياسية في مجلس الامه اعلنت عن الدفاع عن الوزيرة (( مشالله ليش لانهم يعتبرون انفسهم من النخبة لذلك من غير ما ينطرون جلسة الاستجواب وبعدين يحددون ,, اللة بالخير قاموا وزهبوا اطبولهم ودنابكهم عشان لزوم التطبيل والله انا اقول صج عندهم خبره حق تشويه الحقائق وتلفقيق القضايا , لو حاطين لنا قناه اخباريه (عشان ننافس الجزيره ) جان انجحوا , واهم للاسف اول ناس قالوا ان الاستجواب عنصري وقبلي وقاموا يحسسون الناس بهالكلام الفاضي , بصراحه عيب عليهم هالكلام بدال ماتقولون هالكلام الفاضي الي ماله لازمه )) .
2. الحركه الدستوريه الاسلاميه ( حدس) : انا ما اقول الا اطربني ياعم , ياسلام على تغير المواقف , ياسلام على الترقيع الي ماله لازمة , لا بالاخير قاموا يروجون علينا داعيه ( استفتي قلبك ) الله اكبر , اي توجهة اسلامي بصراحة احترمتكم وايد وصج كبار.
3. التجمع الشعبي: بصراحة انتوا اكثر النواب وضوح وبينتوا للناس ان لكل نائب منكم حرية التصويت .
4. نيو اسلاميه : والا خوش كتلة , بصراحة مجموعة عجيب, وتركيبة ولا اروع بس ناقصكم خلف دميثير ويكمل تجمعكم .
5. اعتقد ان الشريع حاول يكحلها عماها , ياخي انت طلعت نفسك بصورة موحلوه حيل , يعني تدري ان د.حسن جوهر كان ناوي يقدم استجواب انزين روح اسالة , شوف شنوعنده صراحة استجوابك اسمحلي , وانا ابي الناس الي قاعد يقولون بانه استجواب راقي وان د.سعد الشريع طرحة قوي , ابيك دكتور تروح الانتخابات الياية ترشح نفسك اهناك وخل انشوف هل عندهم عنصرية والا لا .
6. باقر والعمير : ابداع انتوا بصراحة قاعدين تبدعون كل هذا خوف من حل مجلس الامة , الله يالدنيا الحين انتوا الي تمثلون السلف الصالح قاعدين تسون جذي , بصراحة انتوا واعضاء الحمامات عندكم توجهه مشابهه في بعض النقاط .
7. د. وليد الطبطبائي : بصراحه كبرت وايد , تدرون ليش ؟ انا اقولكم لان الريال توجهه ثابت وانا بصراحة احترمة لانه ماحب يجامل على احساب توجهه .
8. ممكن يكون سيف الحل اهو الي خوف الكثير من النواب .
9. اعتقد ان الحكومه ممكن تكون متواطئه مع مقدم الاستجواب لحمايه الوزيره من استجواب د.حسن جوهر والي كان ممكن لوا صاير يطلع الوزيره بدور اضعف من هذا الدور والي صوره لنا انها بطله قوميه.
10. الناس هذي ماينعرف لها يوم صوت الحريتي مع تجديد الثقه قالوا ان المستجوب مع الناس الي تسانده خلوا الحريتي يصوت ضدهم عشان لا يطلع الاستجواب قبلي , ولو ان مصوت معاهم جان قالوا شوفوا هذا استجواب قبلي .
11. من وجهه نظري الاستجواب فشل لضعف المستجوب من ناحيه وضعف محاوره من ناحيه اخرى .
